Dronninga Landskap
Som vedtatt i reguleringsplan og i styringsgruppa for Bypakke Ålesund starta andre fase i bygginga av kollektivknutepunktet i midten av november 2023. Ein har delt opp arbeidet slik at det har vore mogleg å behalde parkeringsplassane i Keiser Wilhelms gate lengre enn opphaveleg plan, men denne veka vart dei fjerna. Dette gjeld dei skråstilte parkeringsplassane frå Harald Torsvik plass til Posthuskrysset.
Tre fasar for byggeperioden
Arbeidet med kollektivknutepunktet er delt inn i tre ulike fasar, slik at det ikkje blir byggearbeid i alle områda samtidig. Først ut var Korsegata. Dette arbeidet er meir eller mindre ferdig.
- Vi har hatt dialog med næringsdrivande om løysingar for varelevering, parkering og tilkomst til garasjeanlegg i byggeperioden. Denne dialogen vil vi fortsette undervegs i byggeperioden, seier prosjektleiar i Møre og Romsdal fylkeskommune, Torbjørn Vatnehol.
Posthuskrysset blir opna for trafikk i april, og ein kan då køyre inn i Korsegata frå krysset.
Ei gate for folkeliv
Prosjektet er ein del av kollektivsatsinga i Bypakke Ålesund og skal bidra til å korte ned reisetida mellom Hessa og Moa. Når prosjektet står ferdig, blir eitt kvartal av Keiser Wilhelms gate kollektivgate. Korsegata blir open for biltrafikk, men med busslommer på kvar side.
- Vi får eit område som er godt tilrettelagt for mjuke trafikantar med breie, støypte fortau, brostein, nye tre og romslege venteskur. Gatene blir trivelegare og betre lagt til rette for folk og folkeliv enn sånn det er no, seier Vatnehol.
Bypakke Ålesund