Mykje aktivitet i Skarbøvika i vinter.
Kannan Ponnampalam
- Opphaveleg var omfanget av prosjektet å bygge i Tonningsgate fram til krysset ved Tuenesvegen, seier Torbjørn Vatnehol, prosjektleiar i Møre og Romsdal fylkeskommune.
Forlenginga kjem som følgje av at Ålesund kommune vil legge ned ny vassleidning på dette strekket. I staden for å reetablere overflatene i Skarbøvikgata slik dei var før, bygger ein no fortau og sykkelfelt på strekninga fram mot Notholmen rett før Kiwi. I tillegg skal det etablerast betre belysning.
- Det har vore ønskeleg med ei forlenging heilt i frå planleggingsstadiet, men ein har vore avhengig av vedteken reguleringsplan for å bygge denne løysinga. Dette skal no vere i orden, opplyser Vatnehol.
Lysregulering til etter påske
Sidan oppstarten i haust har det vore jobba mykje med sprenging og flytting av masse langs Tonningsgate i Skarbøvika. Arbeidet har så gått inn i ei ny fase med graving av grøfter og nedlegging av vatn- og avløpsrøyr. På grunn av dette arbeidet vil det vere lysregulering på staden til etter påske.
Mesta er entreprenør, medan Møre og Romsdal fylkeskommune er byggherre på dette vegprosjektet i Bypakke Ålesund. På begge sidene av bilvegen kjem eitt felt til fortau og eitt til sykkelfelt. Ålesund kommune oppgraderer vatn- og avløp samstundes, men dette er ikkje finansiert av Bypakke Ålesund.
Prosjektet er venta å stå ferdig hausten 2024.
Opphaveleg skulle prosjektet gå fram til krysset ved Tuenesvegen.
Prosjektet blir forlenga fram til Notholmen