Møre og Romsdal fylkeskommune
Anleggsarbeidet har stått stille sidan hovudentreprenøren Bertelsen & Garpestad AS gjekk konkurs i mars. Konkursen førte til stans i arbeidet og gjorde det nødvendig å lyse ut resten av anleggsarbeidet på nytt.
I august signerte Møre og Romsdal fylkeskommune kontrakt med ACO Anlegg AS som ny hovudentreprenør. Kontraktsummen er på 133,7 millionar kroner, og prosjektet er planlagt ferdigstilt hausten 2027.
Kjem til å be om auka finansiering
– Vi ser at vi treng inntil 118 millionar kroner ekstra for å kunne ferdigstille Blindheim-Flisnes. Denne summen er eit øvre estimat som inkluderer både kjende kostnader og usikkerheit i prosjektet, forklarer Eduardo Martinez Gutierrez, prosjektleiar i Møre og Romsdal fylkeskommune.
Han understrekar at det faktiske finansieringsbehovet kan bli lågare, blant anna dersom fylkeskommunen får dekka delar av meirkostnadane gjennom konkursbuet eller garantisten.
I løpet av hausten vil styringsgruppa til Bypakke Ålesund behandle ei sak om auka styringsramme for prosjektet og korleis dette skal finansierast.
Konkursen har påført prosjektet store ekstrakostnader
Kostnadsauka i prosjektet er knytt til konkursen hos den tidlegare entreprenøren. I tillegg til at dei resterande anleggsarbeida måtte lysast ut på nytt i eit marknad med høgare prisnivå, har prosjektet hatt kostnader knytte til sikring av anleggsområdet, handtering av overskotsmassar, oppfølging av konkursbuet og gjennomføring av ny konkurranse.
Møre og Romsdal fylkeskommune har fremja krav mot både konkursbuet etter Bertelsen & Garpestad AS og entreprenøren sin garantist for å få dekt delar av merkostnadene.
Verken konkursbuet eller garantisten har så langt gitt ei avklaring på krava.
Omkøyring blir fjerna mot slutten av året
Arbeidet blir gjennomført i tre fasar. I den første fasen blir arbeidet hovudsakleg konsentrert langs fylkesvegen mellom Puskhola og området ved Blindheimshallen. Deretter flyttar arbeidet seg vidare mot rundkøyringa på Flisnes. Samstundes vil det etter kvart bli gjennomført arbeid på dei kommunale vegane nord og sør for fylkesvegen.
Planen er å flytte fylkesvegen tilbake til normal trase mot slutten av året. Då kan dagens omkøyring fjernast, samtidig som den nye vegen mellom Blindheimshallen og Puskhola blir opna.
Les meir om planane for anleggsarbeidet her