Sunniva Ullavik Erstad
I Bypakke Ålesund har vi fleire prosjekt med høgt aktivitetsnivå for tida. Mange store køyretøy ferdast både på anleggsområda og på vegane kvar dag.
Denne hausten har vi besøkt barnehagar og ein skule nær anleggsområda våre for å dele ut refleksar og snakke om kor viktig det er å vere trygg og synleg i trafikken.
Kor mange elevar får plass i blindsona?
Sunniva Ullavik Erstad
Statens vegvesen og prosjektet Breivika–Lerstad har i haust besøkt Norlandia Høgvoll barnehage, Lerstad barnehage og Lerstad skole for å dele ut refleksar og snakke om trafikksikkerheit.
På skolen hadde vi med oss Busengdal, som er underentreprenør på prosjektet Breivika-Lerstad. Her fekk elevane lære meir om refleksbruk og trafikksikkerheit.
Under besøket fekk elevane teste ut kor mange som kunne gøyme seg i blindsona til ein lastebil, og kor langt unna dei måtte gå før sjåføren kunne sjå dei og dei kunne vinke til han. På den måten fekk dei oppleve på nært hald kor avgrensa sikta til sjåføren kan vere.
Sjåføren Torgeir Urke kunne fortelje at han køyrer forbi skulen opptil 20 gonger i løpet av ein arbeidsdag.
– Og då er eg berre éin av fleire sjåførar som ferdast på vegane i området her, fortalde han.
Else Britt Ervik
Barna lev tett på anlegga
Møre og Romsdal fylkeskommune har besøkt dei yngste i vegprosjektet Blindheim–Flisnes. Barnehagane Puskhola og Blindheim ligg midt i anleggsområdet, og byggherren svarte på spørsmål og forklarte kva gravemaskinane og lastebilane gjer på.
Prosjektleiar Eduardo Martinez Gutierrez seier at slike besøk er viktige.
- Barna lever tett på anlegget, og då er det kjekt å kunne gi dei litt merksemd med nye refleksvestar og eit hyggeleg besøk, seier Gutierrez
Ver synleg i haustmørket
Refleks gjer at du blir sett tidlegare av bilistar og kan vere avgjerande for tryggleiken din. Vi oppmodar difor både barn og vaksne til å bruke fem minutt i dag på å sjekke at refleksane er på plass.
Bruk refleks og ver synleg i haustmørket, både nær anleggsområda våre og alle andre stader du ferdast. Jo fleire refleksar, desto betre. ✨