Rydding ved Bjørkavollen i 2024.
Else Britt Ervik
Møre og Romsdal fylkeskommune, som er byggherre for prosjektet, har fått eit pålegg frå Ålesund kommune om å fjerne om lag 15.000 kubikk med masse frå to områder i Apalvika. I alt er det levert 147.000 kubikk med massar frå ulike aktørar, i perioden 2015 – 2024. Dette ifølge Ålesund kommune.
- Vi har avslutta køyring av masse til begge områda.
Dette fortel Eduardo Martinez Gutierrez, prosjektleiar for Møre og Romsdal fylkeskommune sine prosjekt i Bypakke Ålesund. Han seier vidare at entreprenøren har oppgåva med etablering av deponi av overskuddsmasser. Fylkeskommunen har ansvaret for kontrakta med entreprenøren.
- Som ansvarleg byggherre ønsker vi å sjå på løysingar i saken saman med kommunen, grunneigar og entreprenøren, seier han.
Møre og Romsdal fylkeskommune står for om lag 10 % av all masse som er levert til deponia. Kommunen har også pålagt grunneigarane om fjerning av resten av dei tilkøyrde massane etter forureiningslova. Klagefristen på vedtaket er innan tre veker frå 26. februar, og fristen for fjerning av masse er 1. desember 2025.