Det kjem mellom anna ny rundkøyring ved Blindheimshallen, men prosjektet blir dyrare enn antatt.
Eivind Finnes
Tiltaka mellom Blindheim og Flisnes er viktig for trafikktryggleiken i området, med betre veg, ny rundkøyring og nye gang- og sykkelvegar. Entreprenøren Bertelsen & Garpestad har kontrakt på arbeidet, med ei opphavleg kontraktsramme på 230 millionar kroner. Prosjektet starta våren 2024 og er planlagt ferdigstilt seinhausten 2026.
Årsaker til kostnadsauken
Kostnadsoverskridinga kjem av fleire forhold. Uventa grunnforhold har påverka tidsbruken. Det var også ei uforutsett hending med oversvømming sommaren 2024. Dette har bidrege til overskridinga saman med omfattande omlegging av høgspentkablar, behov for kjøp av stein til omkøyringsvegen, og høgare pris frå entreprenør enn det som var estimert.
- Det køyrer i overkant av 11 000 bilar i døgnet på fylkesvegen, seier Eduardo Martinez Gutierrez, prosjektleiar i Møre og Romsdal fylkeskommune.
- Prosjektet vil gi ei kraftig oppgradering av bydelane, med eit tryggare vegsystem etter framtidas trafikk sjølv om ein må gjere nokre kutt.
Tiltak og vidare prosess
Møre og Romsdal fylkeskommune har vurdert fleire tiltak for å redusere kostnadane. Det vil bli gjennomført tiltak som å kutte støyskjerming på ei mindre strekning, kutte gangveg i Ospedalsbakken og forkorta strekning med oppgradert veg ved Pushkola. I tillegg vil det i vidare arbeid bli vurdert om vi kan gjenbruke eksisterande veg, framfor å byggje ny. Dette blir vurdert fortløpande.
Sjølv om tiltak blir gjennomført, vil ikkje prosjektet kunne gjennomførast innan kostnadsramma.Styringsgruppa i Bypakke Ålesund blir bedt om å auke rammene for prosjektet i styringsgruppemøtet 3. oktober 2025.
Les meir om prosjektet.