Skal vurdere tiltak ved Volsdalen skole

Torgeir Emblem

Bypakke Ålesund hadde tidlegare eit større prosjekt med ny sykkelveg, oppgradering av fortau, fornying av busstopp og utbetring av vegbane langs Borgundvegen. Dette prosjektet vart stoppa i februar pga. manglande finansiering. Les meir om dette her. 

Møre og Romsdal fylkeskommune har no fått i oppdrag frå styringsgruppa i Bypakke Ålesund å vurdere om det er mogleg å likevel gjennomføre trafikksikringstiltak i området. 

- Det er riktig av oss å gjer ei grundig vurdering etter at det større prosjektet i området vart nedprioritert. Vi har bedt fylkeskommunen om å sjå på om, og eventuelt kva for, tiltak det kan vere mogleg å gjennomføre innanfor dei økonomiske rammene til bypakken. Målet er å sikre ein tryggare skoleveg i området, sei Øystein Tvedt, leiar for styringsgruppa til Bypakke Ålesund. 

Møre og Romsdal fylkeskommune vil starte på arbeidet med å vurdere tiltak i løpet av kort tid. Planen er å legge fram ei sak for styringsgruppa i Bypakke Ålesund i løpet av hausten 2026. Først då vil styringsgruppa ta stilling til kva tiltak som eventuelt kan gjennomførast.